поклоняются тебе пресвятая троице единосущная животворящая
Поклоняются тебе пресвятая троице единосущная животворящая
МОЛИТВЫ НА СОНЪ ГРЯДУЩИМЪ.
(СПб.: Сѵнодальная Тѵпографія, 1887).
Аще іерей, глаголетъ: Б лагословенъ Богъ нашъ:
Аще ли не іерей: М олитвъ ради Пречистыя Твоея Матере, и всѣхъ святыхъ Твоихъ, Господи Іисусе Христе Боже нашъ, помилуй насъ. Аминь.
Таже: С лава Тебѣ, Боже нашъ, слава Тебѣ.
Ц арю Небесный, Утѣ́шителю, Ду́ше истины, Иже вездѣ сый, и вся исполняяй, сокровище благихъ, и жизни Подателю, пріиди, и вселися въ ны, и очисти ны отъ всякія скверны, и спаси, Блаже, души наша.
С вятый Боже, Святый крѣпкій, Святый безсмертный, помилуй насъ. Трижды.
С лава Отцу, и Сыну, и Святому Духу, и нынѣ и присно, и во вѣки вѣковъ, аминь.
П ресвятая Троице, помилуй насъ: Господи, очисти грѣхи наша: Владыко, прости беззаконія наша: Святый, посѣти и исцѣли немощи наша, имене Твоего ради.
[ С лава Отцу, и Сыну, и Святому Духу, и нынѣ и присно, и во вѣки вѣковъ, аминь.]
О тче нашъ, Иже еси на небесѣхъ! да святится имя Твое: да пріидетъ Царствіе Твое: да будетъ воля Твоя, яко на небеси, и на земли. Хлѣбъ нашъ насущный даждь намъ днесь: и остави намъ долги наша, якоже и мы оставляемъ должникомъ нашимъ: и не введи насъ во искушеніе, но избави насъ отъ лукаваго.
Тропари сія, гласъ 6:
П омилуй насъ, Господи, помилуй насъ: всякаго бо отвѣта недоумѣюще, сію Ти молитву яко Владыцѣ грѣшніи приносимъ: помилуй насъ.
Слава: Г осподи, помилуй насъ, на Тя бо уповахомъ, не прогнѣвайся на ны зѣло, нижé помяни беззаконій нашихъ: но при́зри и нынѣ яко благоутробенъ, и избави ны отъ врагъ нашихъ. Ты бо еси Богъ нашъ, и мы людіе Твои, вси дѣлá рукý Твоею, и имя Твое призываемъ.
И нынѣ: М илосердія двери отверзи намъ, Благословенная Богородице, надѣющіися на Тя да не погибнемъ, но да избавимся Тобою отъ бѣдъ: Ты бо еси спасеніе рода Христіанскаго.
Молитва первая святаго Макарія Великаго, къ Богу Отцу.
Б оже вѣчный, и Царю всякаго созданія, сподобивый мя даже въ часъ сей доспѣти: прости ми грѣхи, яже сотворихъ въ сей день, дѣломъ, словомъ и помышленіемъ: и очисти, Господи, смиренную мою душу отъ всякія скверны плоти и духа, и даждь ми, Господи, въ нощи сей сонъ прейти въ мирѣ: да воставъ отъ смиреннаго ми [1] ложа, благоугожду пресвятому имени Твоему во вся дни живота моего, и поперу борющія мя враги плотскія и безплотныя. И избави мя, Господи, отъ помышленій суетныхъ, оскверняющихъ мя, и пóхотей лукавыхъ: яко Твое есть царство, сила и слава, Отца и Сына и Святаго Духа, нынѣ и присно, и во вѣки вѣковъ. Аминь.
Молитва вторая, ко Господу нашему Іисусу Христу, святаго Антіоха.
В седержителю Слово Отчее, Самъ совершенъ сый Іисусе Христе, многаго ради милосердія Твоего, никогдаже отлучайся мене раба Твоего, но всегда во мнѣ почивай, Іисусе, добрый пастырю Своихъ овецъ, не предаждь мене крамолѣ зміинѣ, и желанію сатанину не остави мене, яко сѣмя тли во мнѣ есть. Ты убо Господи Боже покланяемый, Царю Святый Іисусе Христе, спяща мя сохрани немерцающимъ свѣтомъ, Духомъ Твоимъ Святымъ, Имже освятилъ еси Твоя ученики. Даждь, Господи, и мнѣ недостойному рабу Твоему, спасеніе Твое на ложи моемъ: просвѣти умъ мой свѣтомъ разума святаго Евангелія Твоего, душу, любовію креста Твоего, сердце, чистотою словесе Твоего, тѣло мое, Твоею страстію безстрастною, мысль мою Твоимъ смиреніемъ сохрани, и воздвигни мя во время подобно на Твое славословіе. Яко препрославленъ еси со безначальнымъ Твоимъ Отцемъ, и съ Пресвятымъ Духомъ, во вѣки. Аминь.
Молитва третія ко Пресвятому Духу.
Г осподи Царю Небесный, Утѣшителю, Дýше истины, умилосердися, и помилуй мя грѣшнаго раба Твоего, и отпусти ми недостойному, и прости вся, елика Ти согрѣшихъ днесь яко человѣкъ, паче же и не яко человѣкъ, но и горѣе [2] скота, вольныя моя грѣхи и невольныя, вѣдомыя и невѣдомыя: яже отъ юности и отъ науки злы: и яже суть отъ нагльства [3] и унынія. Аще именемъ Твоимъ кляхся, или похулихъ é въ помышленіи моемъ, или кого укорихъ, или оклеветахъ кого гнѣвомъ моимъ, или опечалихъ, или о чемъ прогнѣвахся, или солгахъ, или безгодно [4] спахъ, или нищь пріиде ко мнѣ, и презрѣхъ его, или брата моего опечалихъ, или свадихъ, или кого осудихъ, или развеличахся, или разгордѣхся, или разгнѣвахся, или стоящу ми на молитвѣ, умъ мой о лукавствіи міра сего подвижеся, или развращеніе помыслихъ, или объядохся, или опихся, или безъ ума смѣяхся, или лукавое помыслихъ, или добрóту чуждую видѣвъ, и тóю уязвенъ быхъ сердцемъ, или неподобная глаголахъ, или грѣху брата моего посмѣяхся: моя же суть безчисленная согрѣшенія, или о молитвѣ нерадихъ, или ино что содѣявъ лукавое, не помню: та бо вся и больша сихъ содѣяхъ. Помилуй мя, Творче мой Владыко, унылаго и недостойнаго раба Твоего, и остави ми, и отпусти, и прости мя яко благъ и человѣколюбецъ: да съ миромъ лягу, усну и почію, блудный, грѣшный и окаянный азъ: и поклонюся, и воспою, и прославлю пречестное имя Твое, со Отцемъ, и единороднымъ Его Сыномъ, нынѣ и присно, и во вѣки. Аминь.
Молитва четвертая, святаго Макарія Великаго.
Г осподи Боже нашъ, еже согрѣшихъ во дни семъ, словомъ, дѣломъ и помышленіемъ, яко благъ и человѣколюбецъ прости ми: миренъ сонъ и безмятеженъ даруй ми, Ангела Твоего хранителя посли, покрывающа и соблюдающа мя отъ всякаго зла. Яко Ты еси хранитель душамъ и тѣлесемъ нашимъ, и Тебѣ славу возсылаемъ, Отцу, и Сыну, и Святому Духу, нынѣ и присно, и во вѣки вѣковъ. Аминь.
Г осподи Боже нашъ, въ Негоже вѣровахомъ, и Егоже имя паче всякаго имене призываемъ, даждь намъ ко сну отходящимъ ослабу души и тѣлу, и соблюди насъ отъ всякаго мечтанія, и темныя сласти кромѣ: устави стремленіе страстей, угаси разжженія востанія тѣлеснаго: даждь намъ цѣломудреннѣ пожити, дѣлы и словесы: да добродѣтельное жителство воспріемлюще, обѣтованныхъ не отпадемъ благихъ Твоихъ, яко благословенъ еси во вѣки. Аминь.
Молитва седмая, ко Пресвятѣй Богородицѣ, Петра инока Студійскаго.
К ъ Тебѣ Пречистѣй Божіей Матери, азъ окаянный припáдая, молюся: вѣси, Царице, яко безпрестани согрѣшаю и прогнѣвляю Сына Твоего и Бога моего, и многажды аще каюся, ложь предъ Богомъ обрѣтаюся, и каюся трепéща, не уже ли Господь поразитъ мя, и по часѣ паки таяжде творю. Вѣдущи сія, Владычице моя, Госпоже Богородице, молю, да помилуеши, да укрѣпиши и благая творити да подаси ми: вѣси бо, Владычице моя Богородице, яко отнюдъ имамъ въ ненависти злая моя дѣла, и всею мыслію люблю законъ Бога моего: но не вѣмъ, Госпоже Пречистая, откуду, яже ненавижду, та люблю, а благая преступаю? Не попущай, Пречистая, воли моей совершатися, неугодна бо есть, но да будетъ воля Сына Твоего и Бога моего: да мя спасетъ и вразумитъ, и подастъ благодать Святаго Духа: да быхъ азъ отселѣ престалъ сквернодѣйства, и прочее пожилъ быхъ въ повелѣніи Сына Твоего: Емуже подобаетъ всякая слава, честь и держава, со безпачальнымъ Его Отцемъ, и Пресвятымъ, и благимъ и животворящимъ Его Духомъ, нынѣ и присно, и во вѣки вѣковъ. Аминь.
Молитва осмая ко Пресвятѣй Богородицѣ.
Б лагаго Царя благая Мати, Пречистая и Благословенная Богородице Маріе, милость Сына Твоего и Бога нашего излей на стрáстную мою душу, и Твоими молитвами настави мя на дѣянія благая: да прочее время живота моего безъ порока прейду, и Тобою рай да обрящу, Богородице Дѣво, едина Чистая и Благословенная.
Молитва девятая, ко святому Ангелу Хранителю.
А нгеле Христовъ, хранителю мой святый, и покровителю души и тѣла моего, вся ми прости, елика согрѣшихъ во днешній день, и отъ всякаго лукавствія, противнаго ми врага избави мя: да ни въ коемже грѣсѣ прогнѣваю Бога моего. Но моли за мя грѣшнаго и недостойнаго раба: яко да достойна мя покажеши благости и милости Всесвятыя Троицы, и Матере Господа моего Іисуса Христа, и всѣхъ святыхъ. Аминь.
В збранной воеводѣ побѣдительная, яко избавльшеся отъ злыхъ, благодарственная восписуемъ Ти раби Твои, Богородице: но яко имущая державу непобѣдимую, отъ всякихъ насъ бѣдъ свободи, да зовемъ Ти: радуйся, Невѣсто неневѣстная.
П реславная Приснодѣво, Мати Христа Бога, принеси нашу молитву Сыну Твоему и Богу нашему, да спасетъ Тобою души наша.
В се упованіе мое на Тя возлагаю, Мати Божія, сохрани ми подъ кровомъ Твоимъ.
Б огородице Дѣво, не презри мене грѣшнаго требующа Твоея помощи и Твоего заступленія: на Тя бо упова душа моя, и помилуй мя.
Таже, молитва святаго Іоанникія:
У пованіе мое Отецъ, прибѣжище мое Сынъ, покровъ мой Духъ Святый: Троице Святая, слава Тебѣ.
Таже: Д остойно есть яко воистинну блажи́ти Тя Богородицу, присноблаже́нную и пренепоро́чную и Матерь Бога нашего. Честнѣйшую Херувимъ и сла́внѣйшую безъ сравненія Серафимъ, безъ истлѣнія Бога Слова рождшую, сущую Богородицу, Тя величаемъ. Поклонъ.
С лава, и нынѣ: Г осподи помилуй, трижды. Г осподи благослови.
И отпустъ: Г осподи Іисусе Христе Боже нашъ, молитвами Пречистыя Твоея Матере, преподобныхъ и Богоносныхъ отецъ нашихъ, и всѣхъ святыхъ Твоихъ, помилуй и спаси мя грѣшнаго. Аминь.
Молитва святаго Іоанна Дамаскина, юже, указуя на одръ твой, глаголи:
Таже, съ поклоненіемъ до лица земли, глаголи:
П окланяюся Тебѣ, Пресвятая Троице, единосущная, животворящая и нераздѣлимая, Отче, и Сыне, и Святый Душе: вѣрую въ Тя, и исповѣдуяй славлю, благодарю, хвалю, почитаю, и превозношу Тя, и молю: помилуй мя непотребнаго раба Твоего. Трижды.
П окланяюся Тебѣ, Пресвятая Богородице, Твоимъ рождествомъ явившая намъ Свѣтъ истинный, Царице неба и земли, надеждо ненадежнымъ, помощнице немощнымъ и ходатаице всѣмъ грѣшнымъ: Ты мя покрый и заступи отъ всѣхъ бѣдъ и нуждъ душевныхъ и тѣлесныхъ, и буди ми, молюся, заступница всесильными Твоими молитвами. Поклонъ 1.
П ресвятая Владычице Богородице, пріими сіе малое моленіе, и принеси е́ Сыну Твоему и Богу нашему, да спасетъ и просвѣтитъ Тебе ради, души наша. Поклонъ 1.
С вятый великій Іоанне, Пророче, Предтече и Крестителю Господень, страдавый Христа ради, и пріемый дерзновеніе ко Владыцѣ, помолися о мнѣ грѣшнѣмъ, да спасуся Твоими молитвами. Поклонъ 1.
С вятіи Божіи Апостоли, пророцы, мученицы, святителіе, постницы, преподобніи, праведніи, пустынницы, черноризцы, патріарси, и вси святіи, пострадавшіи Христа ради, и стяжавшіи дерзновеніе ко Владыцѣ, молитеся о мнѣ грѣшнѣмъ, да спасуся вашими молитвами. Поклонъ 1.
С вятый Іоанне Златоусте, со Василіемъ Великимъ, Григоріемъ Богословомъ и чудотворцемъ Николаемъ, и со всѣми святыми священноначальники, помозите, и помилуйте мя молитвами и предстателствомъ вашимъ къ Богу. Поклонъ 1.
С вятіи Россійстіи святителіе, Михаиле, Петре, Алексіе, Іоно и Филиппе, со святыми чудотворными страстотерпцы, Россійскими князи, Романомъ и Давидомъ, и святымъ равноапостольнымъ княземъ Владиміромъ, молите Бога о мнѣ грѣшнѣмъ. Поклонъ 1.
П реподобніи и Богоносніи отцы наши, Антоніе и Ѳеодосіе, Евфиміе, Ѳеоктисте, Савво, Онуфріе, Варсонофіе, Паисіе, Павле препростый, Марко и вси преподобніи, молите Бога о мнѣ грѣшнѣмъ. Поклонъ 1.
П реподобніи отцы наши Антоніе и Ѳеодосіе Печерстіи, съ преподобными своими ученики, Никономъ, Варлаамомъ, Стефаномъ, Исаакіемъ, Моисеемъ, Іоанномъ многострадальнымъ, Маркомъ и прочими (по Преблагословеннѣй Владычицѣ нашей Богородицѣ и Приснодѣвѣ Маріи) сопричастника и наслѣдника мя Царствію Небесному сподобите, благодатію и человѣколюбіемъ Отца, и Сына, и Святаго Духа, во вѣки вѣковъ. Аминь. Поклонъ 1.
В ся святыя жены, мѵроносицы, мученицы, преподобныя, и дѣвы, Христови достойно послужившыя, со святою великомученицею Варварою и всехвальною Іуліаніею, молите Бога о мнѣ грѣшнѣмъ. Поклонъ 1.
Н епобѣдимая и Божественная сило честнаго и животворящаго креста Господня, не остави мя грѣшнаго: но силою Твоею покрый мя отъ всякаго искушенія душевнаго и тѣлеснаго. Поклонъ 1.
П речистая Владычице Богородице, упованіе всѣхъ христіанъ, понеже инаго упованія и надежды не имамъ, развѣ Тебе, всенепорочная Владычице моя, Госпоже Богородице, Мати Христа Бога моего: тѣмже помилуй, и избави мя отъ всѣхъ золъ моихъ, и умоли милостиваго Сына Своего и Бога моего, да помилуетъ окаянную душу мою, и да избавитъ мя отъ вѣчныхъ мукъ, и сподобитъ мя Царствія Своего. Поклонъ 1.
С вятый Ангеле хранителю мой, покрый мя крилома твоея благости, и отжени отъ мене всякое лукавое бѣсовское дѣйство, и моли Бога о мнѣ грѣшнѣмъ. Поклонъ 1.
Хотяй же возлещи на постелю, глаголи сіе:
Слава: З аступникъ души́ моея́ бу́ди, Боже, яко посредѣ хожду сѣтей многихъ: избави ми отъ нихъ, и спаси мя, Блаже, яко Человѣколюбецъ.
И нынѣ: П реславную Божію Матерь, и святыхъ Ангелъ святѣйшую, немолчно воспоимъ, сердцемъ и усты Богородицу сію исповѣдающе, яко воистинну рождшую намъ Бога воплощенна, и молящуюся непрестанно о душахъ нашихъ.
Таже цѣлуй крестъ твой, и прекрести крестомъ мѣсто твое отъ главы и до ногъ, такожде и отъ всѣхъ странъ, глаголя молитву честному кресту:
Д а воскреснетъ Богъ, и расточатся врази Его, и да бѣжатъ отъ лица Его, ненавидящіи Его: яко исчезаетъ дымъ, да исчезнутъ: яко таетъ воскъ отъ лица огня: тако да погибнутъ бѣ́си отъ лица любящихъ Бога, и зна́менующихся крестнымъ знаменіемъ, и въ веселіи глаголющихъ: радуйся, пречестны́й и животворящій кре́сте Господень, прогоняяй бѣсы силою на тебѣ пропятаго Господа нашего Іисуса Христа, во адъ сшедшаго, и поправшаго силу діаволю, и даровавшаго намъ тебе крестъ Свой честны́й на прогнаніе всякаго супостата. О пречестный и животворящій кре́сте Господень, помогай ми со святою Госпожею Дѣвою Богородицею, и со всѣми святыми во вѣки. Аминь.
Прежде даже не возляжеши на одрѣ твоемъ, сія вся помысломъ и памятію твоею прейди.
Пе́рвѣе убо: Б лагодареніе воздаждь Вседержителю Богу, яко дарова тебѣ день мимошедшій, благодатію Своею, въ живыхъ и во здравіи пребыти.
Второе: П оложи слово въ самѣмъ тобою, и испытаніе сотвори совѣсти твоея, преходя, и подробну исчитая вся часы дневныя, наченъ отъ времене, когда восталъ еси отъ одра твоего, и приводя себѣ на память: камо ходилъ еси? что творилъ еси? кому, и что собесѣдовалъ еси? и вся твоя дѣянія, словеса и помышленія, отъ утра даже до вечера тобою произнесенная, со всякимъ опасеніемъ испытай и воспоминай.
Третіе: А ще что́ благое въ сій день сотворилъ еси, не отъ тебе быти сіе, но отъ Сама́го Бога вся благая намъ дарующаго непщуя [8],Тому сіе восписуй и благодари: и да тя въ семъ благомъ утвердитъ, и прочая совершити посо́битъ и даруетъ, молися.
Четвертое: А ще же что́ лукавое содѣялъ еси, отъ тебе сама́го и отъ твоея немощи, или́ лукаваго обычая и произволенія сіе происходити глаголя, кайся, и моли Человѣколюбца, да тебѣ въ томъ прощеніе даровати изволитъ, со обѣщаніемъ твердымъ, яко сего прочее ктому уже творити не и́маши.
Пятое: С о слезами Творца твоего милостива твори, да настоящую нощь тиху, безмятежну, неблазненну, и безгрѣшну даруетъ: день же утрешній, на славословіе имене Его Святаго, цѣло предварити да́руетъ.
Пристеженіе: А ще обрящеши возглавницу мягку, остави ю́, а камень подложи Христа ради. Аще ти зима будетъ спящу, потерпи, глаголя: яко иніи отнюдъ не спятъ (Патерикъ: слово 4). Таже прекрестися, и съ молитвою засни, помышляя день судный, како и́маши предстати Богу.
Примѣчанія:
[1] Моего.
[2] Горше, бѣдственнѣе, хуже.
[3] Гнѣва (ὀξυχολία, iracundia).
[4] Безвременно, непристойно, неприлично.
[5] Великодарный (μεγάδωρος, munificus); ниспосылающій великіе дары, весьма щедрый.
[6] Дѣло, дѣяніе, дѣйствіе.
[7] Умиляюся.
[8] Почитая, признавая.
Источникъ: Акаѳісты съ каноны и прочая душеполезная моленія. — Изданіе первое, съ шестнадцатью священными изображеніями. — СПб.: Въ Сѵнодальной Тѵпографіи, 1887. — С. 377-396.
Канон во время губительного поветрия
В воскресение 22 марта после окончания Божественной Литургии в нашем храме будет служиться молебен вовремя гибительного поветрия. У кого нет возможности помолиться в храме, могут прочесть канон самостоятельно и помолиться дома.
Канон во время губительнаго поветрия и смертоносныя заразы
Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. Трижды.
Слава… И ныне…
Пресвятая Троице, помилуй нас. Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. Трижды
Слава… И ныне…
Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.
Господи, помилуй. 12 раз.
Слава… И ныне…
Приидите, поклонимся Цареви нашему Богу.
Приидите, поклонимся и припадем Христу, Цареви нашему Богу.
Приидите, поклонимся и припадем самому Христу, Цареви и Богу нашему.
Псалом 37
Господи, да не яростию Твоею обличиши мене, ниже гневом Твоим накажеши мене. Яко стрелы Твоя унзоша во мне, и утвердил еси на мне руку Твою. Несть исцеления в плоти моей от лица гнева Твоего, несть мира в костех моих от лица грех моих. Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны моя от лица безумия моего. Пострадах и слякохся до конца, весь день сетуя хождах. Яко лядвия моя наполнишася поруганий, и несть исцеления в плоти моей. Озлоблен бых и смирихся до зела, рыках от воздыхания сердца моего. Господи, пред Тобою все желание мое, и воздыхание мое от Тебе не утаися. Сердце мое смятеся, остави мя сила моя, и свет очию моею, и той несть со мною. Друзи мои и искреннии мои прямо мне приближишася, и сташа. И ближнии мои отдалече мене сташа, и нуждахуся ищущии душу мою: и ищущии злая мне глаголаху суетная, и льстивным весь день поучахуся. Аз же яко глух не слышах, и яко нем не отверзаяй уст своих, И бых яко человек не слышай, и не имый во устех своих обличения. Яко на Тя, Господи, уповах, Ты услышиши, Господи Боже мой. Яко рех: да не когда порадуют ми ся врази мои: и внегда подвижатися ногам моим, на мя велеречеваша. Яко аз на раны готов, и болезнь моя предо мною есть выну. Яко беззаконие мое аз возвещу, и попекуся о гресе моем. Врази же мои живут, и укрепишася паче мене, и умножишася ненавидящии мя без правды. Воздающии ми злая воз благая оболгаху мя, зане гонях благостыню. Не остави мене, Господи Боже мой, не отступи от мене. Вонми в помощь мою, Господи спасения моего.
Псалом 90
Слава… И ныне…
Аллилуия, аллилуия, аллилуия, слава Тебе, Боже. Трижды
Тропарь, глас 2:
Во гневе Твоем, Боже, помяни щедроты Твоя, прах бо и пепел есмы, дух ходяй и не обращаяйся, и не яростию Твоею обличи нас, да не погибнем до конца, но пощади души наша, яко един Милосерд. Дважды.
Слава… И ныне…
Богородичен, глас 4:
Заступнице усердная, Мати Господа Вышняго, за всех молиши Сына Твоего Христа Бога нашего, и всем твориши спастися, в державный Твой покров прибегающим. Всех нас заступи, о Госпоже Царице и Владычице, иже в напастех и в скорбех и в болезнех обремененных грехи многими, предстоящих и молящихся Тебе умиленною душею и сокрушенным сердцем пред пречистым Твоим образом со слезами, и невозвратно надежду имущих на Тя, избавления всех зол, всем полезная даруй и вся спаси, Богородице Дево: Ты бо еси Божественный покров рабом Твоим.
Псалом 50
Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе Единому согреших, и лукавое пред Тобою сотворих: яко да оправдишися во словесех Твоих, и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселие: возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконные путем твоим, и нечестивые к Тебе обратятся. Избави мя от кровей, Боже, Боже спасения моего: возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимские. Тогда благоволиши жертвы правды, возношение и всесожегаемая: тогда возложат на олтарь Твой тельцы.
Канон Пречистей и Единосущней и Животворящей, неразделимей Троице, и ко всем святым
Песнь 1
Ирмос: Колесницегонителя фараоня погрузи чудотворяй иногда Моисейский жезл, крестообразно поразив и разделив море, Израиля же беглеца, пешеходца спасе, песнь Богови воспевающа.
Припев: Милостиве Господи, помилуй рабов Твоих.
Вседетельная, и Срасленая, и Сопрестольная, и Единосильная, и Трисветлая Славо, Отче Непостижиме, Сыне и Душе Святый, лютыя болезни рабы Твоя свободи, яко да благодарственно Тя славим.
Милостиве Господи, помилуй рабов Твоих.
Грехов буря изрину мя в глубину немощи, и частыя болезни, якоже треволнение мя обуревают окаяннаго: Единосильная Державо, Троице Святая, умилосердися, и спаси мя люте погибающа.
Слава: О содержащаго греза избави, Троице нераздельная, нас Твоя рабы, росою милости Твоея угашающи зной лютых моих болезней, и здравие подающи, яко да православно воспеваем Тя.
И ныне, Богородичен: Избавителя и Вседетеля и Господа во чреве носившая, наша недуги, Всечистая, понесшаго: Того убо моли лютыя немощи Твоя рабы избавити, едина человеков Помоще.
Песнь 3
Милостиве Господи, помилуй рабов Твоих.
Небеснии умове, ангельския чины, Престоли, и Начала, и Силы, и Господьства, молят Тя, Благаго и Спаса: губительнаго свободи недуга рабы Твоя.
Милостиве Господи, помилуй рабов Твоих.
Да человеколюбия на мнозе, Владыко, Твоего покажеши бездну, Всесильне, недуга свободи смертоноснаго, и болезней лютых рабы Твоя, Едине Долготерпеливе.
Слава: Яко Божии предстоятели, служебнии дуси, Ангелы и Архангелы, Сего молите, утолити недуг, разорити печаль, смертоносныя же части избавити.
И ныне: Исцелений источника Тя благих показа, бездна из Тебе прошедшая, Христос Господь, Отроковице Пренепорочная, темже рабы Твоя избави, немощи бурею потопляемых.
Избави от бед рабы Твоя, Многомилостиве, яко мы усердно к Тебе прибегаем, к милостивому Избавителю, всех Владыце, в Троице славимому Богу.
Седален, глас 2:
Не отрини до конца согрешшия люди Твоя, Владыко, ниже остави милости и щедроты Твоя о нас, но яко бездна сый щедрот и милосердия пучина, приими мольбы наша, и избави нас от належащия беды и нужды, Един бо еси благоуветливый.
Песнь 4
Милостиве Господи, помилуй рабов Твоих.
Ныне сень воистинну смертная обыде, и ко адовым вратом приближи, но Ты, Спасе, яко силен, нас возставивый, удиви милости Твоя, спасаяй в вере несумненной вопиющих: сле Твоей слава, Человеколюбче.
Милостиве Господи, помилуй рабов Твоих.
Христовы таинницы, самовидцы и проповедницы, приимшии дар исцеления, и врачеве суще душевнии, о нужде мя, Апостоли, изведите содержащаго недуга, Иисуса моляще Владыку, и Избавителя, и Господа.
Слава: Грехов буря ныне нас постиже, немощи волны обуревают, болезни погружают частыя: скорби бо и болезни нас окаянных обретоша. Апостоли Господни, вашими мольбами, помощи руку подайте.
И ныне, Богородичен: Болезньми лютыми и частыми ударяеми, Дево, вси Тебе припадаем: державным покровом Твоим, Чистая, спаси нас всех, ущедри, Богоневестная, избави мора, и лютыя немощи, и болезни исцели, Владычице.
Песнь 5
Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго, но обрати мя, и к свету заповедей Твоих пути моя направи, молюся
Милостиве Господи, помилуй рабов Твоих.
Моря прелести, медоточными вашими моленьми, священнии пророцы потопивше, ныне преложите горесть всю губительныя нынешния немощи, на божественную благомощия сладость.
Милостиве Господи, помилуй рабов Твоих.
Пронзени быхом стрелами немощи, повелением Твоим, Господи, и утвердися на нас рука Твоя, Всесильне: яко Бог Щедрый, ущедри всех Твоею милостию, молитвами святых мучеников Твоих.
Слава: Сына якоже древле сына вдовича возставил еси, Твоим повелением, умерщвлена, Слове, лютыя немощи рабы Твоя, яко един Благ и Милостив, избавивый, оживотвори, едине Человеколюбче.
И ныне, Богородичен: В нощи житейстей буря постиже всякаго озлобления, покрыло мя, Дево, немощи омрачение, но возсияй ми прохлаждения, Пречистая, свет, и к свету благомощия настави.
Песнь 6
Милостиве Господи, помилуй рабов Твоих.
В пучине пропасти и немощей облежим, губительныя напасти обуревают волны, Правителю Господи, помощи руку простер ныне, спаси.
Милостиве Господи, помилуй рабов Твоих.
Расслабленнаго якоже древле стягнул еси, Божественным манием от недуга болезненнаго, и одра озлобления, и от недуга тяжчайшаго, ущедрив даждь здравие, Многомилостиве.
Слава: Пророческий лик, Апостолов собрание, полк страдальцев ныне молит Тя, едине Многомилостиве, о людех Твоих, Блаже, сих ущедри.
И ныне, Богородичен: Марие, чистое девства Сокровище, Ты очисти нас, и недугов, и скорбей, и содержащия ныне немощи избави, да верою Тя прославим.
Избави от бед рабы Твоя, Многомилостиве, яко мы усердно к Тебе прибегаем, к милостивому Избавителю, всех Владыце, в Троице славимому Богу.
Песнь 7
Ирмос: Божия снизхождения огнь устыдеся в Вавилоне иногда. Сего ради отроцы в пещи, радованною ногою, яко во цветнице, ликующе, пояху: благословен еси, Боже отец наших.
Милостиве Господи, помилуй рабов Твоих.
Опаляет пещь безмерных болезней, и сжигает мя огневицы губительныя пламень непрестанно безстуднейший, но росою милости Твоея, Спасе, прохлади поюща: благословен Бог отец наших.
Милостиве Господи, помилуй рабов Твоих.
Пророцы, Апостоли, мучеников собори, божественнии учителие, болезни недугующих нас мольбами укротите, и здравие даруйте поющим: благословен Бог отец наших.
Слава: Словом Лазаря воскресивый, ныне яко из гроба нас лютыя немощи возставивый, оживи, Господи, да вопием песнь благодарственную: благословен Бог отец наших.
И ныне, Богородичен: Щедра сущая, и Мати Всещедраго, ущедривши избави Твоя люди, призывающия милости Твоя, Дево, и поющия: благословен Бог отец наших.
Песнь 8
Ирмос: Седмерицею пещь халдейский мучитель Богочестивым неистовно разжже, силою же лучшею спасены, сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.
Милостиве Господи, помилуй рабов Твоих.
Болезненно стенем, от одра болезни нашея, и от губительныя немощи, вопием к Тебе Человеколюбцу, сердечныя очи ныне простирающе, здравия просим. Посети нас, Спасе, и возстави пети: людие, превозносите во вся веки.
Милостиве Господи, помилуй рабов Твоих.
В нашу немощь милостивне облекийся, и уподобитися человеком изволивый, молитвами преподобных Твоих, отчаянных спаси нас, воздвигни из гроба отчаяния пети: отроцы, благословите, священницы, пойте, людие, превозносите во вся веки.
Слава: Содетелю естества, Подателю исцеления, утробы щедрот и благоутробия пучину яко имеяй, Долготерпеливе, посещением посети от губительныя немощи люди Твоя и оживи вопити: священницы, воспойте, людие, превозносите во вся веки.
И ныне, Богородичен: Крепкая Помоще и известное Заступление, отчаявшихся Надежде, Пренепорочная, посети страждущия болезненно рабы Твоя, облегчи тяжесть горькия немощи, отжени недуг губительныя нужди, и спаси рабы Твоя, Дево Богородице.
Песнь 9
Милостиве Господи, помилуй рабов Твоих.
Чудеса велия, ихже несть числа, сотворивый Безсмертне, на рабы Твоя милости Твоя, Боже, яко Милостив покажи, и содержащия нас ныне свободи болезни, моленьми рождшия Тя, и лика страстотерпцев Твоих.
Милостиве Господи, помилуй рабов Твоих.
Ангелов, Архангелов и пророков, Апостолов, мучеников, преподобных же, иерархов, священномучеников Твоих молитвами, плач рабов Твоих обрати, Всесильне, в радость: исцели болезнь, облегчи недуги, и здравие нам даруй.
Слава: Душ же и телес Врача, в милости богатаго Господа Тебе молю: исцели страсти моя многия, болезней измени и скорбных мя, яко Благ и един Благодетель, и спасай верою чистою Тя величающих.
И ныне, Богородичен: Щедраго рождшая и Милостиваго, и Владыку, и Создателя, и Господа, и ныне на мне покажи Твоя обычно щедроты, и лютаго мя избави недуга, изнуряющего душу мою, Дево Богородице, и подаждь ми здравие, яко да непрестанно величаю Тя.
Достойно есть яко воистинну блажити Тя Богородицу, присноблаженную и пренепорочную, и Матерь Бога нашего. Честнейшую Херувим, и славнейшую без сравнения Серафим, без истления Бога Слова рождшую, сущую Богородицу Тя величаем.
Помилуй нас, Господи, помилуй нас: всякаго бо ответа недоумеюще, сию Ти молитву яко Владыце грешнии приносим: помилуй нас.
Слава: Господи, помилуй нас, на Тя бо уповахом: не прогневайся на ны зело, ниже помяни беззаконий наших, но призри и ныне яко благоутробен, и избави ны от враг наших: Ты бо еси Бог наш, и мы людие Твои, вси дела руку Твоею, и имся Твое призываем.
И ныне: Милосердия двери отверзи нам, благословенная Богородице, надеющиеся на Тя да не погибнем, но да избавимся Тобою от бед: Ты бо еси спасение рода христианскаго.
Господи Боже наш, призри с высоты святыя Твоея на молитву нас грешных и недостойных рабов Твоих, беззаконьми нашими Твою благость прогневавших, и благоутробие Твое раздраживших, и не вниди в суд с рабы Твоими, но отврати страшный гнев Твой, праведно на ны движимый, утоли губительное прещение, устави грозный Твой меч, невидимо безгодно секущий нас, и пощади нищих и убогих рабов Твоих, и не затвори в смерти души наша, в покаянии сокрушенных сердцем и со слезами к Тебе Милосердому, Благоуветливому, и Благопременительному Богу нашему припадающих.